ފާދިއްޕޮޅު ވޮލީ ލީގުގެ ފައިނަލް މެޗު މިރޭ ހިންނަވަރު ވޮލީ ކޯޓުގައި އޮންނާނެއެވެ. މިމެޗުގައި ބައްދަލުކުރާނީ ނައިފަރު ޖުވެނައިލްއާއި ހިންނަވަރު ވޮލީ ޓީމެވެ.
ނައިފަރު ޖުވެނައިލް މުބާރާތުގެ ފައިނަލަށް ދަތުރުކުރީ ކުޅުނު 02 މެޗުން މޮޅުވެ، އަދި ތިންވަނަ މެޗަށް އިދިކޮޅު ޓީމު ހާޒިނުވުމުގެ ސަބަބުން ލިބުނު ޖުމްލަ 9 ޕޮއިންޓާއިއެކު އެންމެ ގިނަ ޕޮއިންޓް ހޯދި ޓީމުގެ ގޮތުގައެވެ. ހިންވަރު ވޮލީޓީމު މުބާރާތުގެ ފައިނަލަށް ދަތުރުކޮށްފައިވަނީ ކުޅުނު 3 މެޗުގެ ތެރެއިން 02 މެޗް ކާމިޔާބުކޮށް ޖުމްލަ 6 ޕޮއިންޓާއިއެކުއެވެ. މިބުރާތާގައި މިދެޓީމު ފުރަތަމަ ބައްދަލުކުރި މެޗު ސީދާ 3 ސެޓުން ކާމިޔާބުކޮށްފައިވަނީ ނައިފަރު ޖުވެނައިލް އެވެ.
މިމުބާރާތުގައި 04 ޓީމް ވާދަކޮށްފައިވާއިރު މުބާރާތް ކުރިއަށްދިޔައީ ކޮންމެ ޓީމެއް ކޮންމެ ޓީމަކާއި ވާދަކޮށް އެންމެ ގިނަ ޕޮއިންޓް ހޯދާ ދެޓީމެއް ފައިނަލްގައި ކުޅޭގޮތަށެވެ. މުބާރާތުގެ ޗެމްޕިއަން ޓީމަށް -/25000 ރުފިޔާ އަދި ރަނަރއަޕް ޓީމަށް -/10000 ރުފިޔާގެ ފައިސާގެ އިނާމު ހުށަހެޅިފައިވާ މުބާރާތެކެވެ. މިމުބާރާތުގެ ވަނަ ވަނައަށް އައި ފަރާތްތަކަށް އިނާމު ދިނުމުގެ ރަސްމިއްޔާތު މިރޭގެ ފައިނަލް މެޗަށްފަހު ހިންނަވަރު ވޮލީކޯޓް ސަރަހައްދުގައި ކުރިއަށްދާނެއެވެ.